Мягмар гарагт Украины агаарын хүчин Крымийн хойгийн Феодосия боомтод байрлаж байсан Оросын Хар тэнгисийн флотын десантын хөлөг онгоц Новочеркасскийг пуужингийн цохилтоор устгаснаа зарласан билээ.
ОХУ-ын батлан хамгаалах яам сүүлд энэ мэдээллийг баталсан ч хохирлын талаар тоо баримт дэлгээгүй юм.
Тэгвэл өчигдөр Крымийн хойгийн Севастополь хотын НТС телевизийн суваг цохилтын үеэр 74 усан цэрэг алагдсан тухай Хар тэнгисийн флотын эх сурвалж дээр үндэслэн мэдээлжээ.
Ижил мэдээ “Новостей Севастополя” цахим хуудсанд бас нийтлэгдсэн юм.
Гэвч сүүлд дээрх мэдээнүүд аль аль эх сурвалжаас устгагдсан байна.
Google-ийн хайлтын системийн кэшт хадгалагдаж үлдсэн мэдээг энэ холбоосоор харах боломжтой хэвээр байгаа.
Мэдээнд дурдсанаар бол Новочеркасск хөлөг пуужингийн цохилтод өртөх үеэр 74 усан цэрэг алагдаж, 27 цэрэг шархаджээ.
Флотын ерөнхий командлагч Николай Евменов хотод хоёр өдрийн гашуудал зарлаж, амь үрэгдэгсдийн ар гэрийнхэнд туслах асуудлыг авч үзэх саналыг орон нутгийн засаг захиргааны тэргүүн Юрий Лысенкод тавьсан тухай эх сурвалж мэдээлсэн байна.
Украины арми энэ дайны турш Оросын Хар тэнгисийн флотын 20 орчим хөлгийг устгасан гэх тоо бий.
Үүний улмаас Оросын тал Хар тэнгисийн баруун хагаст хяналтаа алдаж, Украины үр тарианы экспортын тээвэрт саад учруулж чадахгүй болсон гэдэг.
Мөн Хар тэнгисийн флотын хөлгүүдийг Крымийн боомтуудаас холдуулж, Оросын эх газрын эрэгт байрлуулах шаардлагатай болсон тухай эх сурвалжууд мэдээлж байна.
Новочеркасск хөлөг сүйрэх үеэр Хар тэнгисийн флотын сургалтын зориулалттай УТС-150 ангиллын T-43 хөлөг бас гэмтжээ.
Эх сурвалж: The Moscow Times
0 cэтгэгдэлтэй