Өчигдөр буюу Лхагва гарагт АНУ-ын дээд шүүх тус улсын түүхэнд анхны тохиолдол болох азотын хий ашиглан гүйцэтгэх цаазын ялд хориг тавихаас татгалзсан шийдвэр гаргажээ.
Өнөөдөр буюу Пүрэв гарагт Алабама мужийн шоронд алуурчин Кеннет Смитийг ийм аргаар цаазлах гэж байгаа юм. Тэрбээр 2022 онд хоёр удаа үхлийн тариа тариулсан ч судас нь олдоогүйгээс амжилтгүй болсон тул Алабама муж хуулиа шинэчилж, азотын хийгээр хордуулах цаазын аргыг хэрэглэхээр болсон юм.
Харин 58 настай ялтан Смит АНУ-ын үндсэн хуулийн наймдугаар нэмэлтийн дагуу харгис шийтгэлээс өөрийгөө хамгаалуулахаар цаазын гүйцэтгэлийг зогсоох хүсэлтийг дээд шүүхэд гаргаж байжээ. Өмнө нь тэр шат шатны шүүхэд хандсан ч татгалзсан хариу авсан байна.
Шинэ аргаар цаазлахдаа Смитийн нүүрэнд азотын хийн савтай холбосон баг зүүж, хүчилтөрөгчийн дутагдалд оруулах юм.
Тэрбээр 1988 онд нэгэн эмэгтэйн амийг нөхрийнх нь захиалгаар хөнөөсөн хэрэгт цаазын ял сонссон байна. Эхнэрийнхээ амь насны даатгалын мөнгийг авах зорилготой байсан нөхөрт нь бас цаазын ял оноосныг 2010 онд гүйцэтгэж байжээ.
Алабама мужийн эрх баригчид цаазын шинэ аргыг хэрэгжүүлэх тоног төхөөрөмжийг бэлдэж, гүйцэтгэх үед эмч мэргэжилтнүүдийг байлцуулахаар болсон байна.
Смитийн цаазын ялыг Пүрэв гарагийн шөнө дундын 00:00 цагаас хойш 30 цагийн дотор буюу дараагийн өдрийн өглөөний 06:00 цагаас өмнө гүйцэтгэх шийдвэр гарчээ.
Нэгдүгээр сарын 16-нд НҮБ-ын хүний эрхийн байгууллага олон улсын хуульд харшилсан харгис арга хэрэглэх гэж буй тул цаазын ял гүйцэтгэлээ зогсоохыг Алабама мужийн засаг захиргаанд уриалж байв.
АНУ-ын мужууд цаазын ялыг хэрхэн гүйцэтгэх арга техникийг өөрсдөө шийддэг. Европын Холбоо эмийн компаниуддаа цаазын ял гүйцэтгэлд ашигладаг тариа үйлдвэрлэхийг хориглосон нь асуудлыг улам хэцүү болгоод байгаа.
Үүнтэй холбоотойгоор Алабама, Миссисипи, Оклахома мужууд цаазын гүйцэтгэлд хордуулагч хий ашиглах шинэ журам нэвтрүүлсэн юм.
Эх сурвалж: Reuters
0 cэтгэгдэлтэй