Сонгуулийн сурталчилгааны өдрүүдэд үнэн, худал мэдээллийн дайн болж байхад сонголт өгөх сонгогчдын мэдэх эрхийг хангах ганц бодитой арга бол бол зөвхөн  мэтгэлцээн.  Үүнтэй сонгогчид бараг 100 хувь санал нэгдэж байгаа. Гэвч өнөө орой болохоор төлөвлөөд байсан Ерөнхийлөгчийн сонгуулийн халз мэтгэлцээнд оролцох боломжгүй гэдгээ АН-аас нэр дэвшигч Х.Баттулга мэдэгдэв.

Мэтгэлцээнийг 16 телевизээр дамжуулахаар төлөвлөж, телевизүүд бэлтгэлээ хангаад байжээ.  Энэ тухай Монголын телевизийн холбооноос саяхан хэвлэлийн бага хурал хийв. Тэд орой бүр телевизээр гарч байгаа захиалгат нэвтрүүлгүүд, сошиалаар цацагдаж байгаа хар, цагаан пиараас огт өөр,  сонгогчдод  үнэнийг мэдэх  боломжийг олгоогүй нэр дэвшигч Х.Баттулгад харамсаж байгаагаа илэрхийлэв. 

Төрийн тэргүүнээ сонгох энэ удаагийн сонгуулийг “түүхэн” гэхэд болно. Учир нь эдийн засаг унасан, нийгмээрээ хямарсан, сонгуулийн сурталчилгааны хар пиар, гүтгэлэг хэтэрхий их байгаа нөхцөлд сонгогчдод бодит мэдээллийг хүргэхийн төлөө Монголын телевизүүд үүргээ гүйцэтгэхийн төлөө байгаад  талархах хэрэгтэй. Харин нэр дэвшигч Х.Баттулга нэг, хоёр телевизээс бусдыг нь “худалдагдсан” гэж мэдэгдэв.

Мэтгэлцээний үед нэр дэвшигч өөрөө л сайн байж чадвал телевиз хэнийх байх сонин биш. “Хэн нь хэн бэ”, хэн нь юуны төлөө Ерөнхийлөгчид нэр дэвшиж байна вэ гэдгийг мэдүүлэх боломжит ганц арга бол мэтгэлцээн.  

Нэр дэвшигчдийг мэтгэлцүүлье гэж олон нийт санал бодлоо илэрхийлж, шаардаж, #Мэтгэлцүүлье гэсэн чээлэнж хүртэл өрнүүлээд  байтал Х.Баттулга мэтгэлцэхээс зайлсхийсээр байна.

“Мэтгэлцэхгүй” гэж мэдэгдэл хийснийхээ дараахан нэр дэвшигч Х.Баттулга сонгогчидтой хийсэн уулзалтан дээрээ “Улстөрчид бага ярья, ард түмнээ сонсьё”  гэж ярьжээ. Гэвч тэр яриад л яваа, М.Энхболд, С.Ганбаатар хоёр ч яриад л яваа. Учир нь одоо сонгуулийн сурталчилгаа явагдаж байна.

Өнөөдөр хамгийн их ярих ёстой гурван хүн бол нэр дэвшигчид. Тиймээс тэр яриагаа багцлаад үзэгчдийн өмнө   яриулахыг, үзэл бодол, бодлого хөтөлбөрөөрөө мэтгэлцэхийг  мэтгэлцээн гэдэг.

Харамсалтай нь мэтгэлцэхээс татгалзаж  байгаа Х.Баттулга нэгдүгээрт  сонгогчдын  мэдэх эрхийг, үнэнийг мэдэх хүслийг  хүндэтгэсэнгүй. 

Хоёрдугаарт, нэр дэвшигч Х.Баттулга өөрөө  үзэл бодлоороо мэтгэлцэхэд бэлэн биш байна гэсэн сэтгэгдэл төрүүлж байна. 

16 телевизээр өнөө цацагдах  байсан мэтгэлцээн хууль, шударга ёсны сэдэвтэй байв. Дараагийн удаа эдийн засгийн сэдвээр мэтгэлцүүлэхээр төлөвлөөд байжээ.

Дараагийн удаа мэтгэлцээндээ заавал оролцоорой гэж Х.Баттулгаас хүсэх л одоо үлдлээ. Таныг сонгогчид #Мэтгэлцүүлье давалгаанд урьж байгааг анзаараарай.

Өнөөдөр та “ард түмнээ сонсьё” гэж хэлэв. Гэвч сонгуулийн үед  таныг дэмжигчид л үгээ хэлнэ. Дэмжихгүй, эсвэл хэнийг сонгохоо мэдэхгүй байгаа мянга мянган хүн нэр дэвшигчдийг зөвхөн  сонсохыг л хүсч  байна. Тиймээс та мянга мянган сонгогчийн хүслийг биелүүлж, дараагийн удаа мэтгэлцээнд заавал ирээрэй.

 Мэтгэлцүүлье гэдэг нь  С.Ганбаатарын, эсвэл М.Энхболдын талд орж буй  хэрэг биш юм Мэтгэлцүүлье гэдэг нь үнэнийг мэдэх эрхээ эдэлье л гэж байгаа юм. 

 

 

 

Т.Үлэмж

ХАРИУ СЭТГЭГДЭЛ БИЧИХ