Японд цар тахлын нөхцөл байдал хүндэрлээ

access_time 2020-04-19
remove_red_eye 180

Дэлхий даяар коронавирусийн халдвар тарж эхлэх үед Япон нь тахлыг амжилттай хязгаарлаж чадсан улсад тооцогдож байв.

Гэвч сүүлийн хэдэн долоо хоногт энэ улсад халдварын тоо эрчимтэй нэмэгдэж, Баасан гарагийн байдлаар 9,787 тохиолдол бүртгэгдэж, 190 хүн нас бараад байна.

Нөхцөл байдал муудаж эхэлсэнтэй холбоотой ерөнхий сайд Абэ Шинзо долоон бүс нутагт тогтоогоод байсан онц байдлыг орон даяар болгон өргөжүүлжээ.

Тэр бас эмнэлгийн ажилчдын хамгаалалтын хэрэгслийн хангамжийг долоо хоногийн дотор нэмэгдүүлэхээ Баасан гарагт амласан юм.

Энэ долоо хоногийн эхээр хэсэг судлаачид хэрвээ хорио цээрийн дэглэм тогтоохгүй бол Япон даяар 400,000 гаруй хүн нас барах магадлалтай болсныг засгийн газартаа анхааруулжээ.

Эдгээрийн ихэнх нь амьсгалын аппарат хүрэлцээгүй байдлаас үүдэлтэй нас барна гэж тооцоолсон байна.

Япон даяар эмнэлгүүдэд хамгаалалтын хувцас, хэрэглэл хомс байгаа нь саяхнаас ил болсон юм. Тухайлбал энэ долоо хоногт Осака хотын захирагч Ичиро Мацуй хэрэглэдэггүй борооны цув байвал эмнэлгүүдэд хандивлахыг иргэдэд уриалжээ. Одоо эмнэлгийн ажилтнууд хогны уутыг хамгаалах хувцас болгон ашиглаж байгаа бөгөөд борооны цувыг бас ингэж ашиглах зорилготой байна.

Эмч нарын хамгаалалтын хувцас хэрэгсэл хомс байгаа дээр нэмээд оношилгооны тоо хэмжээ бага байгаа нь Японд коронавирусийн тархалтыг эрчимжүүлэх аюул үүсгэж байгааг мэргэжилтнүүд анхааруулсан байна.

Дөрөвдүгээр сарын 12-нд Токиогийн Накано дүүргийн эмнэлэгт халдвар тарж, нийт 87 эмч, сувилагч өвчилсөн тухай хотын захиргаа мэдээлжээ. Эмнэлгийн ажилтнууд халдвар авах нь цааш нийтэд тараах нөхцөл болдог тухай ДЭМБ анхааруулж байв.

Хоёрдугаар сард Японд анхны халдварын тохиолдол илэрсэн цагаас хойш эрх баригчид зөвхөн халдвартай бүлгийг нийтээс тусгаарлах, холбоотой хүмүүсийг нь оношлоход анхаарал хандуулж, нийт иргэдийг оношилгоо шинжилгээнд хамруулах ажлыг хойш тавьсан юм.

Энэ нь хөрш Өмнөд Солонгосын бодлогоос өөр байв. Өнөөдрийн байдлаар 126 сая хүн амтай Японд дөнгөж 90,000 хүнийг оношлоод байгаа бол 51 сая хүн амтай Өмнөд Солонгос 513,000 хүнийг оношилжээ.

Тиймээс Японд шинэ коронавирусийн халдварын бодит тоо албан ёсны тооноос хавьгүй илүү байх өндөр магадлалтай гэж мэргэжилтнүүд үзэж байна.

Тус улс өдөрт 12,000 оношилгоо хийх чадалтай ч одоогийн байдлаар 6,000-7,000 орчмыг гүйцэтгэж байгаа тухай эрүүл мэндийн яам нь саяхан мэдээлсэн юм.

Энэ хоцрогдлоо нөхөхийн тулд сүүлийн үед оношилгоог нэмэгдүүлэх ажил эхлээд байна. Тухайлбал Токио хотын захиргаа хот даяар 20 оношлох цэг нэмж байгуулахаар болсныг Лхагва гарагт зарлажээ.

Япон даяар 100,000 иргэн тутамд оногдох эрчимт эмчилгээний орны тоо 7 байгаа нь бас нэг санаа зовоох үзүүлэлт юм.

Харьцуулбал АНУ-д энэ үзүүлэлт 35 байдаг.

126 сая хүн амтай Япон улсад нийт 22,000 амьсгалын аппарат байгаагаас хоёрдугаар сарын сүүлээр 40 хувь нь ашиглагдаж байжээ.

Энэ бүх тоо баримтаас үзвэл ойрын өдрүүдэд коронавирусийн цар тахал Япон улсын эрүүл мэндийн системийн чадлыг шалгах төлөвтэй байна.

 

Эх сурвалж: CNN

Холбоотой мэдээ

АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

© 2020 Бүх эрх хуулиар хамгаалагдсан.

Холбоо барих: 8900-4549