ХАННАМ ИХ СУРГУУЛИЙН ЗАХИРАЛ МАШИН УНАЛГҮЙ, ОЮУТНЫ ТЭТГЭЛЭГТ 450 САЯ ВОН ХЭМНЭЖЭЭ

access_time 2019-06-21
remove_red_eye 299

 

БНСУ-ын Тэжон-ы Ханнам Их Сургуулийн захирал И Док Хүн өөрийн унах машинаас татгалзан оюутнуудад зориулсан тэтгэлэгт 450 сая вон хуримтлуулж чадсан тухай өчигдөр мэдэгджээ.

И Док Хүн нь 2016 онд тус сургуулийн захиралаар томилогдон тангараг өргөхдөө оюутнуудад зориулсан тэтгэлэг хуримтлуулахаа амласан ба тэрээр энэхүү тэтгэлгийг маш энгийнээр буюу сургуулийн зүгээс өөрт нь зориулан гаргах машинаас татгалзан сургууль руугаа ирэх 4 км замыг явган явж байхаар шийдвэрлэснээр жилдээ 150 сая вон хуримтлуулах боломжийг бүрдүүлжээ.

Энэ нь машин түрээсийн үйлчилгээний үнийн тариф болон шатахуун зарцуулалтыг тооцон гаргасан нэгдсэн дүн ажээ.

Ийнхүү тэрээр 4 дэх жилдээ 4 км замыг 40 минут явган явснаар 450 сая вон хуримтлуулж “Даниель-ийн тэтгэлэг” санг байгуулжээ.

Мэдээж энэхүү сан нь юуны түрүүнд тус сургуульд сурлага, хөдөлмөрөөрөө үлгэр жишээч оюутнуудын номын сан, дотуур байрны зардлууд болон тус сургуульд эхлэн суралцагч оюутны төлбөрийн хөнгөлөлт зэрэгт зарцуулагдах бөгөөд Ханнам Их Сургуулийн оюутнуудын дунд “Брендийн тэтгэлэг” хэмээн нэрлэгдэх болжээ. Түүнээс гадна уг сангийн мөнгийг байгаль орчныг цэвэрлэх, цэгцлэх ажилд зарцуулах зорилттой байгаа юм байна.

И Док Хүн захирал “Өглөө бүр ажилдаа алхан ирж оюутнуудтай мэндлэх болгонд сэтгэл сэргэдэг” гээд “Тайван алхаж ирэх бүрд тэр өдрийн ажлаа төлөвлөхөөс гадна олон янзын гэгээлэг бодол орж ирэх нь цаашдын ажилд маань ихээхэн тус болдог” гэжээ.

Холбоотой мэдээ

АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

© 2020 Бүх эрх хуулиар хамгаалагдсан.

Холбоо барих: 8900-4549