Хятадад нүүрлэсэн их үерт хоёр сая гаруй хүн өртжээ

access_time 2019-06-16
remove_red_eye 708

 

Хятадын өмнөд, зүүн өмнөд болон зүүн хэсгийн нутгаар сүүлийн бараг хагас сарын туршид усархаг бороо үргэлжлэн орж байгаа юм. Тус улсын өмнөд болон төвийн нутгаар энэ долоо хоногт хүчтэй аадар бороо орсны улмаас их хэмжээний үер бууж, 61 хүн амь үрэгдэж, 356 мянган хүнийг үерийн бүсээс нүүлгэн шилжүүлсэн тухай тус улсын Онцгой байдлын яамнаас мэдээлжээ.

Гамшигт үзэгдэлд Шанжао, Цзиань, Интань, Фужоу зэрэг нутгийн нийтдээ хоёр сая гаруй оршин суугч өртсөн байна.

Уг мэдэгдэлд дурдсанаар, үерийн улмаас 9300 байшин нурж, 3,71 сая га газар тариалан сүйдэж, нийт 13,35 тэрбум юанийн хохирол учирсан байна. Мөн онцгой байдлын аврагчид Хөх мөрний дээд хэсэгт оршдог Чунцин мужид 4300 гаруй хүнийг үерийн уснаас аварч Гуандун мужийн зүүн өмнөд хэсэг рүү нүүлгэн шилжүүлжээ.

Энэ жил БНХАУ-ын хойд бүс нутагт хур тунадасны хэмжээ бага байх бол өмнөд бүс нутагт аадар борооны улмаас Шар мөрний дагуу үерийн гамшиг нүүрлэж болзошгүй байгааг Хятадын Онцгой байдлын яам анхаарууллаа.

Холбоотой мэдээ

АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

© 2019 Бүх эрх хуулиар хамгаалагдсан. seruuleg.mn

Холбоо барих: 8900-4549