Нутаг нэг явах юмсан Их хотын түгжрэлээс гараад Хөдөө тал дээгүүр давхих юмсан…

access_time 2019-04-16
remove_red_eye 130

 

Нутаг нэг явах юмсан
Хурдан бороо унах юмсан
Хусуураа зүүгээд хөлслөх юмсан
Хур бороонд цув өмсөхгүй норох юмсан
Хуучин хүрэн дээлээ дээш хөөргөн бүслэх юмсан
Нутаг нэг явах юмсан

Солонго татаж, цэцэгс алагласан талаар
Соотон борийгоо унаад давхих юмсан
Тэргүүн өндөрийн оргилд гараад
Шүлэг тэрлэн суух юмсан
Нутаг нэг явах юмсан
Ухаант буурал, уул шиг нөмөртэй аавдаа
Духаа өгөн үнсүүлэх юмсан
Ачит ээжийнхээ аагтай шаргал цайны
Анхилуун үнэрт сэрэх юмсан
Нутаг нэг явах юмсан

Таван ханатай гэрээ ногоон зүлгэн дээр бариад
Тооноор нар тустал унтах юмсан
Унага татан гурийлж
Уулсаа тольдон зогсох юмсан
Нутаг нэг явах юмсан
Их хотын түгжрэлээс гараад
Хөдөө тал дээгүүр давхих юмсан
Төрсөн нутагтаа очоод
Ижийдээ эрхэлж үнсүүлэх юмсан
Нутаг нэг явах юмсан

Холбоотой мэдээ

АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

© 2019 Бүх эрх хуулиар хамгаалагдсан. seruuleg.mn

Холбоо барих: 8900-4549